Ֆերմա

ԴԵՂԻ ՁԵՎԸ ԵՎ ԲԱՂԱԴՐՈՒԹՅՈՒՆԸ

Դեղաձևը՝ միջմկանային ներարկման համար նախատեսված էմուլսիա։ Դեղամիջոցի 1 սմ³-ը պարունակում է ակտիվ բաղադրիչ՝ 5 մգ պրոպրանոլոլի հիդրոքլորիդ։ Օժանդակ նյութերն են՝ գլիցերին, լեցիտին, քլորբութանոլի հիդրատ և ներարկման ջուր։

ԱՐՏԱՔԻՆ ՏԵՍՔԸ

Դեղամիջոցը կաթնագույնից մինչև բաց դեղին գույնի էմուլսիա է։ Պահպանման ընթացքում հնարավոր է փուլերի տարանջատում, որը վերանում է թափահարումից հետո։

ՓԱԹԵԹԱՎՈՐՈՒՄԸ

Դեղամիջոցը հասանելի է 50 և 100 սմ³ ծավալով գունավոր ապակե սրվակներով։

ՊԱՀՊԱՆՄԱՆ ԵՎ ՏԵՂԱՓՈԽՄԱՆ ՊԱՅՄԱՆՆԵՐԸ

Դեղամիջոցը պահել և տեղափոխել արտադրողի փաթեթավորմամբ՝ լույսից պաշտպանված, 2 °C-ից մինչև 25 °C ջերմաստիճանում։ Պահել երեխաների համար անհասանելի վայրում։

ՊԻՏԱՆԵԼԻՈՒԹՅԱՆ ԺԱՄԿԵՏԸ

Դեղամիջոցի պիտանելիության ժամկետը արտադրության օրվանից 2 տարի է՝ պահպանման և տեղափոխման սահմանված պայմանների պահպանման դեպքում։ Սրվակն առաջին անգամ բացելուց հետո դեղամիջոցը պահել ոչ ավելի, քան 14 օր՝ պահպանման սահմանված պայմանների պահպանմամբ։ Չօգտագործել պիտանելիության ժամկետը լրանալուց հետո։ Դեղամիջոցը ոչնչացնել գործող օրենսդրությանը համապատասխան։

ԲԱՑԹՈՂՄԱՆ ՊԱՅՄԱՆՆԵՐԸ

Դեղամիջոցը բաց է թողնվում առանց անասնաբույժի դեղատոմսի։

ԴԵՂԱԲԱՆԱԿԱՆ ՀԱՏԿՈՒԹՅՈՒՆՆԵՐԸ

«Ուտերոբել» անասնաբուժական դեղամիջոցը պարունակում է պրոպրանոլոլի հիդրոքլորիդ, որը ոչ ընտրողական բետա-ադրեներգիկ ընկալիչների արգելակիչ է։

Պրոպրանոլոլը արգելափակում է միոմետրիումի բետա-ադրեներգիկ ընկալիչները, ինչի հետևանքով ուժեղանում են արգանդի և կաթնագեղձերի հարթ մկանների կծկումները։ Այն կատեխոլամինների անտագոնիստ է և ունի արտահայտված հակասթրեսային ազդեցություն։ Դեղամիջոցն ուժեղացնում է ինքնաբուխ և արգանդոտոնիկներով առաջացած արգանդի կծկումները։ Այն նվազեցնում է ծննդաբերության և հետվիրահատական շրջանում առաջացող արգանդային արյունահոսությունը։

Միջմկանային ներարկումից հետո արգանդի կծկումների հաճախականությունն ու ուժգնությունն աստիճանաբար ավելանում են և պահպանվում մինչև 24 ժամ։

Պրոպրանոլոլը լավ է ներծծվում ներարկման տեղից և օրգանիզմից արտազատվում է հիմնականում մետաբոլիտների ձևով՝ լեղու և երիկամների միջոցով։

Դեղամիջոցի էմուլսիոն ձևը նպաստում է ակտիվ նյութի դանդաղ ազատմանը և պաշտպանում այն արագ կենսատրանսֆորմացիայից։

Օրգանիզմի վրա ազդեցության աստիճանի հիման վրա դեղամիջոցը դասակարգվում է որպես ցածր վտանգավորության նյութ՝ վտանգավորության 4-րդ դաս (ըստ ԳՕՍՏ 12.1.007-ի)։

ԿԻՐԱՌՄԱՆ ՑՈՒՑՈՒՄՆԵՐԸ

Դեղամիջոցն օգտագործվում է կովերի մոտ արգանդի կծկումների խանգարումների, արգանդի ենթաինվոլյուցիայի հետ կապված հետծննդյան բարդությունների կանխարգելման, ընկերքի պահման, հետծննդյան էնդոմետիտի, արգանդի ատոնիայի և հիպոտոնիայի դեպքում, ինչպես նաև ծննդաբերության խթանման նպատակով։ Խոզերի մոտ դեղամիջոցն օգտագործվում է ծննդաբերության խթանման և մետրիտ-մաստիտ-ագալակտիայի համախտանիշի կանխարգելման ու բուժման համար։

ԿԻՐԱՌՄԱՆ ԵՎ ԴԵՂԱՉԱՓՄԱՆ ԿԱՐԳԸ

Օգտագործելուց առաջ սրվակը թափահարել մինչև համասեռ էմուլսիայի առաջացումը։

Դեղամիջոցը կիրառվում է միջմկանային ճանապարհով։

Կովերին և խոզերին ծննդաբերությունը խթանելու նպատակով դեղամիջոցը կիրառվում է ծննդաբերության շրջանում մեկ անգամ՝ յուրաքանչյուր կենդանուն 10 սմ³ դեղաչափով։

Կովերին ծննդաբերության հետ կապված բարդությունների կանխարգելման նպատակով դեղամիջոցը կիրառվում է 10 սմ³ դեղաչափով՝ 2 անգամ, 24-ժամյա ընդմիջմամբ, սկսած ծննդաբերությունից հետո առաջին օրվանից։

Ընկերքի պահումով կովերին դեղամիջոցը կիրառվում է 2–3 անգամ՝ 24-ժամյա ընդմիջումներով, յուրաքանչյուր կենդանուն 10 սմ³ դեղաչափով։

Արգանդի ենթաինվոլյուցիա և հետծննդյան էնդոմետիտ ունեցող կովերին դեղամիջոցը կիրառվում է 2–3 անգամ՝ 24-ժամյա ընդմիջումներով, յուրաքանչյուր կենդանուն 10 սմ³ դեղաչափով՝ էթիոտրոպ և պաթոգենետիկ թերապիայի հետ համատեղ։

Խոզերին մետրիտ-մաստիտ-ագալակտիայի համախտանիշի կանխարգելման նպատակով դեղամիջոցը կիրառվում է մեկ անգամ՝ յուրաքանչյուր կենդանուն 5 սմ³ դեղաչափով, անմիջապես ծննդաբերությունից հետո։

ՀԱԿԱՑՈՒՑՈՒՄՆԵՐ ԵՎ ԴԵՂԱՄԻՋՈՑՆԵՐԻ ՓՈԽԱԶԴԵՑՈՒԹՅՈՒՆ

Դեղամիջոցը չի կարելի կիրառել հղի կենդանիներին կամ աննորմալ ծննդաբերության դեպքերում, այդ թվում՝ պտղի ոչ ճիշտ դիրքի, խոշոր պտուղների կամ պտղի զարգացման անոմալիաների առկայության դեպքում։

Դեղամիջոցը երկարացնում է քսիլազինի ազդեցությունը և կարող է դանդաղեցնել լիդոկաինի նյութափոխանակությունը։

Պրոպրանոլոլի կիրառման ընթացքում յոդ պարունակող դեղամիջոցների միջմկանային ներարկման դեպքում մեծանում է անաֆիլակտիկ ռեակցիաների առաջացման վտանգը։

ՉԱՓԻՑ ԱՎԵԼԻ ԴԵՂԱՉԱՓԻ ԿԻՐԱՌԵԼԸ 

Դեղամիջոցի չափից ավելի դեղաչափի դեպքում կենդանիների մոտ կարող են դիտվել սրտի կծկումների հաճախականության նվազում և մկանային թուլություն։ Ծանր կողմնակի ազդեցությունների, մասնավորապես՝ չափից ավելի դեղաչափի հետևանքով առաջացած կայուն բրադիկարդիայի դեպքում, ատրոպինի սուլֆատի լուծույթը՝ 0,05 մգ/կգ մարմնի զանգվածի հաշվով, դանդաղ ներարկել ներերակային ճանապարհով։

ՍՆՆԴԱՅԻՆ ՍԱՀՄԱՆԱՓԱԿՈՒՄՆԵՐ

Կենդանիների միսը և կաթը կարող են օգտագործվել սննդային նպատակներով՝ առանց սահմանափակումների։

ԿԱՆԽԱՐԳԵԼԻՉ ՄԻՋՈՑԱՌՈՒՄՆԵՐ

Դեղամիջոցի հետ աշխատելիս պահպանել անձնական հիգիենայի և անվտանգության ընդհանուր կանոնները։