Ֆերմա

ԴԵՂԻ ՁԵՎԸ

Ներարկման լուծույթ։

ԲԱՂԱԴՐՈՒԹՅՈՒՆԸ

Նատրիումի քլորիդի իզոտոնիկ 0,9% ներարկման լուծույթի 1 մլ-ը պարունակում է 9 մգ նատրիումի քլորիդ՝ որպես ակտիվ բաղադրիչ, և ներարկման ջուր՝ որպես օժանդակ նյութ։

ՆԿԱՐԱԳՐՈՒԹՅՈՒՆԸ

Դեղամիջոցը թափանցիկ, անգույն հեղուկ է։

ՊԱՀՊԱՆՄԱՆ ԺԱՄԿԵՏԸ ԵՎ ՊԱՀՊԱՆՄԱՆ ՊԱՅՄԱՆՆԵՐԸ

Դեղամիջոցի պահպանման ժամկետը, պահպանման սահմանված պայմանների դեպքում, բնօրինակ, չբացված փաթեթավորմամբ արտադրության օրվանից 2 տարի է։ Բացելուց հետո դեղամիջոցի չօգտագործված մնացորդը չպետք է պահվի։ Չօգտագործել պիտանելիության ժամկետի ավարտից հետո։ Պահել բնօրինակ փաթեթավորմամբ՝ արևի ուղիղ ճառագայթներից, սննդից և կերից հեռու, 2°C-ից մինչև 25°C ջերմաստիճանում։ Պահել երեխաների համար անհասանելի վայրում։

ՓԱԹԵԹԱՎՈՐՈՒՄԸ

Դեղամիջոցը փաթեթավորված է 100 մլ տարողությամբ ապակե սրվակներում, որոնք փակված են ռետինե խցաններով և ամրացված ալյումինե կափարիչներով։ Յուրաքանչյուր սպառողական փաթեթավորմանը կցվում է օգտագործման հրահանգը։

ՉՕԳՏԱԳՈՐԾՎԱԾ ԴԵՂԱՄԻՋՈՑԻ ՀԵՌԱՑՈՒՄԸ

Չօգտագործված դեղամիջոցը հեռացնել օրենքով սահմանված պահանջներին համապատասխան։

ԴԵՂԱՏՈՄՍՈՎ ԲԱՑ ԹՈՂՆՈՒՄԸ

Նատրիումի քլորիդի իզոտոնիկ 0,9% ներարկման լուծույթը բաց է թողնվում առանց անասնաբույժի դեղատոմսի։

ԴԵՂԱԲԱՆԱԿԱՆ ԽՈՒՄԲԸ ԵՎ ԴԵՂԱԲԱՆԱԿԱՆ ՀԱՏԿՈՒԹՅՈՒՆՆԵՐԸ

Նատրիումի քլորիդի իզոտոնիկ 0,9% ներարկման լուծույթը պատկանում է նյութափոխանակության վրա ազդող դեղամիջոցների խմբին։ Դեղամիջոցը իզոտոնիկ է կենդանիների արյան պլազմայի նկատմամբ և նպաստում է օրգանիզմի ջրաէլեկտրոլիտային ու թթվահիմնային հավասարակշռության կարգավորմանը։ Ներարկումից հետո նատրիումի քլորիդը արագորեն ներծծվում է ներարկման տեղից և տարածվում օրգաններում ու հյուսվածքներում։

ԳՕՍՏ 12.1.007-76-ի համաձայն՝ նատրիումի քլորիդի իզոտոնիկ 0,9% ներարկման լուծույթը դասակարգվում է որպես ցածր վտանգավորության նյութ՝ վտանգի 4-րդ դաս, և հյուսվածքների նկատմամբ տեղային գրգռիչ ազդեցություն չունի։

ԿԻՐԱՌՄԱՆ ՑՈՒՑՈՒՄՆԵՐԸ

Նատրիումի քլորիդի իզոտոնիկ 0,9% ներարկման լուծույթը կիրառվում է կենդանիների մոտ զգալի հեղուկի կորստի, այդ թվում՝ արյունահոսության և տոքսիկ դիսպեպսիայի, շոկի, թունավորման, մետրիտի և վագինիտի դեպքում, ինչպես նաև տարբեր դեղամիջոցների լուծման համար։

ՀԱԿԱՑՈՒՑՈՒՄՆԵՐԸ

Հակացուցումներն են հիպերնատրեմիան, ացիդոզը, հիպերքլորեմիան, հիպոկալեմիան, արտաբջջային հիպերհիդրատացիան, ուղեղային և թոքային այտուցի առաջացման վտանգով ուղեկցվող արյան շրջանառության խանգարումները, ինչպես նաև ուղեղային և թոքային այտուցները։

ՀԱՏՈՒԿ ՑՈՒՑՈՒՄՆԵՐ

Հղի և կրծքով կերակրող կենդանիների, ինչպես նաև ձագերի մոտ կիրառման հայտնի հակացուցումներ կամ հատուկ նախազգուշական միջոցներ չկան։ Երիկամային կամ սրտային անբավարարություն ունեցող կենդանիների մոտ դեղամիջոցը կիրառել զգուշությամբ։

ԿԻՐԱՌՄԱՆ ԵՎ ԴԵՂԱՉԱՓՄԱՆ ԿԱՐԳԸ

Նատրիումի քլորիդի իզոտոնիկ 0,9% ներարկման լուծույթը կիրառվում է ենթամաշկային կամ ներերակային եղանակով։ Օրական առավելագույն դեղաչափերը մեկ կենդանու համար կազմում են՝ խոշոր եղջերավոր անասունների համար՝ 2000–5000 մլ, ձիերի համար՝ 1000–2500 մլ, մանր որոճողների համար՝ 100–300 մլ, խոզերի համար՝ 100–200 մլ, շների համար՝ 10–200 մլ, կատուների համար՝ 5–50 մլ։ Դեղաչափը և կիրառման տևողությունը կախված են կենդանու մարմնի քաշից և հիվանդության ընթացքից։ Ենթամաշկային ներարկման դեպքում ընդհանուր դեղաչափը պետք է բաժանել մի քանի մասի և ներարկել տարբեր տեղերում։

ԿՈՂՄՆԱԿԻ ԱԶԴԵՑՈՒԹՅՈՒՆՆԵՐԸ

Դեղամիջոցը հրահանգներին համապատասխան կիրառելիս կողմնակի ազդեցություններ և բարդություններ, որպես կանոն, չեն նկատվում։

ՉԱՓԻՑ ԱՎԵԼԻ ԴԵՂԱՉԱՓԸ

Չափից ավելի դեղաչափի դեպքում կարող են դիտվել փսխում, լուծ, ծարավ, թքարտադրության և արցունքահոսության նվազում, քրտնարտադրության խանգարում, մարմնի ջերմաստիճանի բարձրացում, տախիկարդիա, արյան ճնշման բարձրացում, երիկամային անբավարարություն, ծայրամասային և թոքային այտուց, շնչառության կանգ, անհանգստություն, դյուրագրգռություն, թուլություն, մկանային կծկումներ և կոշտություն, ընդհանրացված ցնցումներ, կոմա և մահ։ Բուժումը ախտանշանային է։

ՓՈԽԱԶԴԵՑՈՒԹՅՈՒՆԸ ԱՅԼ ԴԵՂԱՄԻՋՈՑՆԵՐԻ ՀԵՏ

Նատրիումի քլորիդի 0,9% իզոտոնիկ ներարկման լուծույթի կիրառումը չի բացառում այլ դեղամիջոցների միաժամանակյա օգտագործումը։ Այլ դեղամիջոցների հետ նույն ներարկիչում խառնելու դեպքում պետք է հաշվի առնել դրանց համատեղելիությունը։

ԴԵՂԱՄԻՋՈՑԻ ԿԻՐԱՌՄԱՆ ՍԿԶԲԻ ԿԱՄ ԴԱԴԱՐԵՑՄԱՆ ԱԶԴԵՑՈՒԹՅՈՒՆԸ

Դեղամիջոցի առաջին կիրառման կամ դրա կիրառման դադարեցման ընթացքում էական հատուկ ազդեցություններ չեն նկատվել։

ԴԵՂԱՉԱՓԻ ԲԱՑԹՈՂՈՒՄԸ

Մեկ կամ մի քանի դեղաչափ բաց թողնելու դեպքում հատուկ միջոցառումներ չեն պահանջվում։ Բաց թողնված դեղաչափը լրացնելու նպատակով կրկնակի դեղաչափ չկիրառել։

ԱՆՁՆԱԿԱՆ ԿԱՆԽԱՐԳԵԼՄԱՆ ՄԻՋՈՑՆԵՐ

Նատրիումի քլորիդի իզոտոնիկ 0,9% ներարկման լուծույթի հետ աշխատելիս պետք է պահպանել անձնական հիգիենայի և դեղամիջոցների հետ աշխատելու անվտանգության ընդհանուր կանոնները։ Դեղամիջոցի որևէ բաղադրիչի նկատմամբ գերզգայունություն ունեցող անձինք պետք է խուսափեն դեղամիջոցի հետ անմիջական շփումից։ Դեղամիջոցի հետ աշխատելիս արգելվում է խմել, ծխել և ուտել։ Աշխատանքն ավարտելուց հետո ձեռքերը լվանալ տաք ջրով և օճառով։

Դեղամիջոցի սրվակները չի թույլատրվում օգտագործել կենցաղային նպատակներով և դրանք պետք է հեռացվեն կենցաղային աղբի հետ միասին։ Դեղամիջոցի՝ մաշկի կամ աչքերի լորձաթաղանթների հետ պատահական շփման դեպքում անմիջապես լվանալ մեծ քանակությամբ ջրով։ Ալերգիկ ռեակցիայի կամ դեղամիջոցի պատահական կուլ տալու դեպքում անմիջապես դիմել բժշկական հաստատություն՝ ձեզ մոտ ունենալով դեղամիջոցի օգտագործման հրահանգը կամ պիտակը։

ՄՍԻ ԵՎ ԿԱԹԻ ՕԳՏԱԳՈՐԾՄԱՆ ՍՊԱՍՄԱՆ ԺԱՄԿԵՏԸ

Դեղամիջոցը կիրառելու ժամանակահատվածում կենդանական ծագման մթերքները և կաթը կարող են օգտագործվել սննդի նպատակներով՝ առանց սահմանափակումների։